Նորություններ
«Կրթական ծրագրերի կենտրոնը» հյուրընկալել է Շվեդահայ գիտնական Կարո Հակոբյանին
12.11.2018
Նոյեմբերի 12-ին «Կրթական ծրագրերի կենտրոն» ԾԻԳ–ում «Կրթության համակարգում տվյալների հավաքագրման և առաջընթացի մշտադիտարկման բարելավում» ենթաբաղադրիչի ղեկավար Հարություն Ղարիբջանյանը հյուրընկալել էր Շվեդահայ գիտնական, Եվրոպայի հայերի համագումարի նախագահ Կարո Հակոբյանին: Հանդիպմանը ներկա էր նաև ՏՀՏ դասընթացավար Սոնա Ղազարյանը: Հանդիպման առանցքում կրթության արդիականացման խնդիրներն էին և վերոնշյալ ժամանակահատվածում ընթացող ՏՀՏ վերապատրաստման դասընթացներին առնչվող որոշ հարցեր: Հիշեցնենք, որ մայրաքաղաքում և ՀՀ մարզերում «Կրթության համակարգում տվյալների հավաքագրման և առաջընթացի մշտադիտարկման բարելավում» ենթաբաղադրիչի աշխատանքների համատեքստում ընթանում են հանրակրթական ուսումնական հաստատությունների ներկայացուցիչների ՏՀՏ վերապատրաստաման դասընթացները, որոնք իրականացվում են կանադական հեղինակավոր Ագենս Յունիվերսարի Դե Լա Ֆրանկոֆոն կազմակերպության կողմից վերապատրաստված և միջազգային հավաստագիր ստացած տեղական դասախոսների կողմից՝ նույն կազմակերպության կողմից մշակված յոթ մոդուլներով: Հանդիպման ընթացքում դասընթացավար Սոնա Ղազարյանը հյուրին ներկայացրեց «Հիբրիդ կրթություն», «Շրջված դասարան» թեմաների համատեքստում ՏՀՏ գործիքների կիրառության առանձնահատկությունները, որին մանկավարժները ծանոթանում են վերապատրաստումների ընթացքում: Շվեդահայ գիտնականի հետ քննարկեց վերապատրաստման արդյունքում մանկավարժների կողմից կազմված ինտերակտիվ դասընթացները, փաստելով, որ վերոնշյալ վերապատրաստումների արդյունքում մանկավարժները տիրապետում են ՏՀՏ նոր գործիքների, հետաքրքիր մուլտիմեդիա նյութերի ստեղծմանը:
Կարո Հակոբյանը ծանոթանալով մշակված 7 մոդուլներին՝ առաջարկեց մասնակից դառնալ ՏՀՏ վերապատրաստման դասընթացներին և այդ մոդուլների շարքում ներդնել ևս մի քանիսը, որոնք կարող են կիրառվել ավագ դպրոցում, նշելով , որ դրանց կիրառությունը և արդյունավետությունը փորձված են շվեդական կրթական համակարգում : «ՏՀՏ այդ գործիքների ներդնումը կարող է նպաստել ավանդական կրթական համակարգի վերափոխմանը, նոր ուսումնական նյութերի, դասավանդման մեթոդաբանության ստեղծմանը ավագ դպրոցում»,-նշեց շվեդահայ գիտնականը: Հանդիպման ընթացքում հյուրը խոսեց նաև դպրոցներում համընդհանուր համակարգչային գրագիտության բարձրացմանը, տեխնիկական մտածելակերպի ձևավորմանն ուղղված ծրագրերի մասին, փաստելով, որ նմանօրինակ ծրագրերի պակասը Հայաստանում ակնհայտ է:
«Տեղեկատվական և հաղորդակցական տեխնոլոգիաների ավելի լայն օգտագործումը որակապես կփոխի ուսուցչի դերը, ուսուցիչը կդառնա սովորողի կրթական գործը կազմակերպող, նրան աջակցող և գնահատող գործընկեր»,-հավելեց շվեդահայ գիտնականը: