Կրթական ծրագրերի կենտրոն Կրթության, գիտության, մշակույթի և սպորտի նախարարություն

 Հայաստանի Հանրապետությունը Համաշխարհային բանկի հետ համագործակցությամբ իրականացնում է <<Կրթության բարելավում>> վարկային ծրագիրը, որի շրջանակներում մեկնարկում է Նորարարությունների մրցակցային հիմնադրամի (ՆՄՀ) հավելյալ շրջափուլը միայն այն բուհերի համար, որոնք չեն հանդիսացել ՆՄՀ դրամաշնորհառու <<Կրթության որակ և համապատասխանություն>> և <<Կրթության բարելավում>> վարկային ծրագրերի շրջանակներում իրականացված փորձնական և առաջին շրջափուլերի ընթացքում: ՆՄՀ-ն բարձրագույն կրթության ոլորտում նորարարությունները խթանող մեխանիզմ է, որի միջոցով ՀՀ բուհերին մրցակցային հիմունքներով տրամադրվում են դրամաշնորհներ նորարարական ու զարգացման ծրագրերի իրականացման և բուհերի կարողությունների հզորացման նպատակով: ՆՄՀ հավելյալ շրջափուլով բուհերին դրամաշնորհների տրամադրման գործընթացը կազմակերպվում է ՀՀ ԿԳ նախարարի կողմից 19.07.2016 թ. թիվ 741-Ա/2 հրամանով հաստատված ՆՄՀ գործարկման ղեկավար ձեռնարկով:
ՆՄՀ-ն աջակցում է բուհերի այն ծրագրերին, որոնք ուղղված են կրթության համապատասխանության, արդյունավետության և հասանելիության բարձրացմանը:
ՆՄՀ հավելյալ շրջափուլի համար հաստատված գերակա ուղղությունները հետևյալն են.
1. Տեղեկատվական և հաղորդակցական տեխնոլոգիաներ
2. Բնական գիտություններ
3. Հումանիտար և հասարակական գիտություններ
4. Արվեստ/սպորտ
ՆՄՀ-ի միջոցներով ֆինանսավորվող ծրագրերի տեսակներն են.
• Կոնսորցիումային ծրագրեր, որոնք կնպաստեն սերտ համագործակցությանը` համատեղ ծրագրերի մեջ միավորելով պետական և ոչ պետական բուհերի, մասնավոր ձեռնարկությունների և կազմակերպությունների, գիտահետազոտական հաստատությունների, որոնք կարող են լինել ինչպես տեղական կազմակերպություններ, այնպես էլ օտարերկրյա: Կոնսորցիումը պետք է բաղկացած լինի առնվազն մեկ բուհից և մեկ գործարար ոլորտի և/կամ գիտահետազոտական ընկերությունից: Կոնսորցիումային ծրագրի շրջանակներում տրամադրվող դրամաշնորհի գումարը առավելագույնը 600,000 ԱՄՆ դոլարին համարժեք դրամ է:
• Պետական բուհերի ծրագրեր, որոնք ուղղված են առանձին պետական բուհերի, այդ թվում նաև նրանց մարզային մասնաճյուղերի առանձնահատուկ խնդիրների լուծմանը` ռազմավարական զարգացման առաջնահերթությունների և կրթական ոլորտում նորարար լուծումների հիման վրա: Այս տիպի դրամաշնորհային ծրագրերը հասցեագրված են նաև մայրաքաղաքի և մարզային բուհերի միջև առկա մասնատվածության/անհամաչափ զարգացման խնդիրների լուծմանը: Տվյալ բուհի մարզային մասնաճյուղ(եր)ը դրամաշնորհային ծրագրում ընդգրկելը (եթե այդպիսիք կան), կդիտվի որպես առավելություն դրամաշնորհային ծրագրերի գնահատման ժամանակ: Հաշվի առնելով այն հանգամանքը, որ բուհի մասնաճյուղը չունի առանձին իրավաբանական անձի կարգավիճակ, բուհի մասնաճյուղը չի կարող առանձին հայտ ներկայացնել: Տրամադրվող դրամաշնորհի գումարը առավելագույնը 300,000 ԱՄՆ դոլարին համարժեք դրամ է:
• Ոչ պետական բուհերի ծրագրեր, որոնք ուղղված են ոչ պետական բուհերի առանձնահատուկ խնդիրների լուծմանը, կարողությունների զարգացմանը և նորարար ծրագրերի իրականացմանը: Փոքր բուհերի կոնսոլիդացիային նպաստելու և բուհերի միջև համագործակցությունը խթանելու նպատակով ոչ պետական բուհերը խրախուսվում են ներկայացնել համատեղ ծրագրեր: Տրամադրվող դրամաշնորհի գումարը առավելագույնը 300,000 ԱՄՆ դոլարին համարժեք դրամ է:
Բոլոր ծրագրերը պետք է իրականացվեն 24 ամսվա ընթացքում: Ներկայացվող բոլոր ծրագրերի համար պարտադիր է հաստատության կողմից առնվազն 10 տոկոս համաֆինանսավորումը:
ՆՄՀ հավելյալ շրջափուլին հայտ ներկայացնելու համար, բացի հայտարարության սկզբնամասում նշված՝ ՆՄՀ դրամաշնորհառու չհանդիսանալու պահանջից, բուհերը պետք է բավարարեն հետևյալ իրավասության չափանիշներին `
• ինստիտուցիոնալ հավատարմագրման կամ ինստիտուցիոնալ պայմանական հավատարմագրման առկայություն,
• հաստատված ռազմավարական ծրագրի (և/կամ բիզնես պլանի` կոնսորցիումի մասնակից համապատասխան կազմակերպությունների համար) առկայություն, առնվազն ներկայացվող ՆՄՀ դրամաշնորհային ծրագրի տևողության համար, ինչը կերաշխավորի, որ դրամաշնորհային հայտում ներկայացված առաջնահերթություններն ու նպատակները համահունչ են ռազմավարական առաջնահերթություններին,
• ֆինանսական կառավարման և ներքին վերահսկողության համակարգի ստուգման բավարար արդյունքներ` ներկայացված հայտի փաստաթղթերի փաթեթում - ՆՄՀ դրամաշնորհային հայտում հիմնական հայտատու նշվող բուհերը հայտերի պատրաստման փուլում պետք է անցնեն ֆինանսական կառավարման և ներքին վերահսկողության համակարգի ստուգում: Ֆինանսական կառավարման և ներքին վերահսկողության համակարգի ստուգման աշխատանքների նկարագիրը հասանելի է ստորև: Ստուգումը պետք է իրականացվի ԿԾԿ կողմից ընդունելի աուդիտորների կողմից, որոնց ցանկը նույնպես ներառված է ստուգման աշխատանքների նկարագրում: Բուհերը հայտի պատրաստման ընթացքում պատասխանատու են տվյալ ցանկից որևէ ընկերությանը դիմելու, վերջինիս կողմից նշված ստուգումը անցկացնելու և արդյունքները ըստ պատշաճի ստանալու համար: Այն բուհերի հայտերը, որոնք ստուգման արդյունքներով կստանան կատեգորիա Ա կամ Բ խմբի խնդիրներ և թերություններ արձանագրող հաշվետվություն, կդիտվեն իբրև ոչ իրավասու: Կատեգորիա Գ խմբի խնդիրները որևէ ազդեցություն չեն ունենա բուհի` հայտ ներկայացնելու իրավասության վրա, սակայն գնահատման ընթացքում տվյալ բուհը կխրախուսվի ուղղել/կարգավորել հայտնաբերված խնդիրները:

ՆՄՀ-ին դիմելու համար դրամաշնորհային հայտի ձևը, Ղեկավար ձեռնարկը կից բոլոր հավելվածներով, ինչպես նաև բուհերի Ֆինանսական կառավարման և ներքին վերահսկողության համակարգի ստուգման աշխատանքային նկարագիրը, դրամաշնորհային ծրագրերի ընթացքում բողոքների կարգավորման մեխանիզմը և դիմելու վերաբերյալ մանրամասն տեղեկատվությունը տրված են կցված փաստաթղթերում:
Դրամաշնորհային հայտ ներկայացնելու վերջնաժամկետը ս.թ. հոկտեմբերի 25-ն է: Տվյալ ժամկետից ուշ ներկայացված հայտերը չեն դիտարկվի:
Լրացուցիչ հարցերի և պարզաբանումների համար դիմել <<Կրթական ծրագրերի կենտրոն>> ԾԻԳ, ք. Երևան, Ս. Վրացյան 73 հասցեով կամ զանգահարել (010) 57-56-90, ներքին (50),(51),(52),(53),(54) հեռախոսահամարներով:

ՆՄՀ Ղեկավար ձեռնարկ

Հայտի ձևաչափ և այլ հավելվածներ

Ֆինանսական կարողությունների գնահատման նկարագիր