Կրթական ծրագրերի կենտրոն Կրթության, գիտության, մշակույթի և սպորտի նախարարություն

ԲՏՃՄ առարկաների դասավանդման որակի բարելավման և ուսումնական գործընթացում ժամանակակից լաբորատոր հնարավորությունների առավել արդյունավետ կիրառման նպատակով վերապատրաստումները շարունակվում են նաև ՀՀ Տավուշի մարզում։ Վերապատրաստումների հերթական փուլն անցկացվում է մարզի հանրակրթական դպրոցներում՝ ուսուցիչներին հնարավորություն տալով գործնական միջավայրում ծանոթանալ լաբորատոր սարքավորումներին և դրանց կիրառման առանձնահատկություններին։ Օգոստոսի 17-24-ը վերապատրաստումներ են իրականացվել Իջևանի թիվ 5 և Գանձակի միջնակարգ դպրոցներում, իսկ օգոստոսի 24-28-ը դասընթացներն անցկացվել են Կողբի միջնակարգ դպրոցում։ Վերապատրաստման ընթացքում կարևոր տեղ է հատկացվում լաբորատոր սարքավորումների ուսումնական գործընթացում արդյունավետ կիրառմանը։ Դասընթացների միջոցով ուսուցիչները հնարավորություն են ստանում զարգացնելու այն գործնական հմտությունները, որոնք անհրաժեշտ են լաբորատոր աշխատանքների կազմակերպման և առարկայական ծրագրերի շրջանակում գործնական ուսուցման ապահովման համար։ Ժամանակակից լաբորատոր միջավայրի կիրառումը հատկապես կարևոր է ԲՏՃՄ առարկաների ուսուցման համատեքստում՝ հնարավորություն ընձեռելով տեսական գիտելիքները փոխկապակցել գործնական աշխատանքի հետ և ուսումնական գործընթացն առավել կիրառական դարձնել։ Տավուշի մարզում իրականացվող վերապատրաստումները ԲՏՃՄ ուղղությամբ ուսուցիչների մասնագիտական զարգացմանն ուղղված շարունակական գործընթացի մաս են կազմում։ Դրանց նպատակն է նպաստել նոր կրթական մոտեցումների և առարկայական չափորոշիչներին համապատասխան գործնական աշխատանքների արդյունավետ իրականացմանը։ Վերապատրաստումների շարունակական բնույթը հնարավորություն է տալիս դպրոցներում աստիճանաբար ամրապնդել ժամանակակից լաբորատոր ենթակառուցվածքների կիրառման մշակույթը: