Կրթական ծրագրերի կենտրոն Կրթության, գիտության, մշակույթի և սպորտի նախարարություն

ՀՀ հանրակրթական ուսումնական հաստատությունները շարունակում են համալրվել ԲՏՃՄ և ՏՀՏ ժամանակակից ինժեներական լաբորատորիաներով։ Նոր լաբորատոր ենթակառուցվածքների արդյունավետ կիրառումն ապահովելու նպատակով Երևանում , ինչպես ՀՀ մարզերում, իրականացվում են ուսուցիչների վերապատրաստումներ՝ ուղղված ուսումնական գործընթացում լաբորատոր սարքավորումների կիրառման արդյունավետության բարձրացմանը։ Վերապատրաստումները Երևանում մեկնարկել են օգոստոսի 17-ից՝ Երևանի թիվ 135 և թիվ 38 հիմնական դպրոցներում։ Դասընթացներին ակտիվորեն ներգրավված են Երևան քաղաքի Ավան և Նոր Նորք վարչական շրջանների հանրակրթական դպրոցների ԲՏՃՄ առարկաների ուսուցիչները։ Ծրագրի շրջանակում մշակվել են ուսուցիչների վերապատրաստման հատուկ մոդուլներ, որոնք հասանելի են նաև առցանց հարթակում։ Վերապատրաստումներն իրականացնում են մրցութային կարգով ընտրված փորձագետները՝ ուսուցիչներին տրամադրելով ինչպես տեսական գիտելիքներ, այնպես էլ գործնական հմտություններ։ Ուսուցիչներին մեթոդական աջակցություն ապահովելու նպատակով մշակվել են նաև ցուցադրական տեսանյութեր, որոնք կարող են կիրառվել լաբորատոր սարքավորումներն օգտագործելիս։ Վերապատրաստման նյութերն ու տեսանյութերը ներառում են լաբորատոր սարքավորումների շահագործման և ընթացիկ սպասարկման, ինչպես նաև դրանք դասապրոցեսում արդյունավետ կիրառելու վերաբերյալ ուղեցույցներ։ Առանձնահատուկ ուշադրություն է դարձվում սարքավորումների կիրառմանը դասավանդման ժամանակակից մեթոդաբանության և թվային ուսումնաօժանդակ նյութերի համադրմամբ։ Նման մոտեցումը հնարավորություն է տալիս ուսումնական գործընթացում ավելի մեծ տեղ հատկացնել գործնական աշխատանքներին՝ դրանք համապատասխանեցնելով առարկայական նոր չափորոշիչներին և ծրագրերին։ Ժամանակակից սարքավորումներով հագեցած լաբորատորիաները ուսուցիչներին հնարավորություն են տալիս կազմակերպել առավել գործնական և կիրառական ուսուցում՝ նպաստելով սովորողների գիտելիքների ու հմտությունների զարգացմանը։ Երևանում վերապատրաստումներն իրականացվում են 10 խմբով՝ 5 առարկաներից: Վերապատրաստումները կամփոփվեն օգոստոսի 21-ին։ «Կրթության որակի ապահովում» ծրագրի շրջանակում իրականացվող վերապատրաստումները կարևոր քայլ են ԲՏՃՄ առարկաների դասավանդման արդիականացման և դպրոցներում ստեղծված նոր լաբորատոր հնարավորությունների արդյունավետ օգտագործման ուղղությամբ:
ԲՏՃՄ առարկաների ուսուցիչների վերապատրաստումները շարունակվում են Երևանում