Կրթական ծրագրերի կենտրոն Կրթության, գիտության, մշակույթի և սպորտի նախարարություն

«Բնագիտություն, տեխնոլոգիա, ճարտարագիտություն և մաթեմատիկա» ոլորտի գերազանցության կենտրոնի հիմնում, ապագա և ներկա ուսուցիչների կարողությունների զարգացում» դրամաշնորհային ծրագրի շրջանակներում ՀՊՄՀ-ում անցկացվեց սեմինար-քննարկում: Ծրագիրը իրականացվում է Համաշխարհային բանկի համաֆինանսավորմամբ ու «Կրթական ծրագրերի կենտրոն» ԾԻԳ-ի աջակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում: Հանդիպմանը ներկա էր Մաթեմատիկայի, ֆիզիկայի և ինֆորմատիկայի, Կենսաբանության, քիմիայի և աշխարհագրության ֆակուլտետների աշխատակազմը։
Սեմինարի ընթացքում ՀՊՄՀ-ի ռեկտորի խորհրդական, մանկավարժական գիտությունների թեկնածու, դոցենտ Հակոբ Թադևոսյանը ներկայացրեց նորաստեղծ կենտրոնի գործունեության արդյունավետության նպատակով ծրագրի շրջանակներում մշակված հիմնարար փաստաթղթերը։ Մասնավորապես՝ հայեցակարգի, գործունեության կանոնակարգի, լաբորատորիաների աշխատանքի անվտանգության պահպանման կարգի, զարգացման ռազմավարական ծրագրի (2025-2029թթ․) կառուցվածքը, բովանդակային հիմնական դրույթները, կենտրոնի գնահատման համար հիմնական կատարման ցուցանիշները։ Ծավալվեց կառուցողական քննարկում՝ կենտրոնի առաքելության, նպատակի, խնդիրների, գործառույթների, գործունեության ուղղությունների, որակի, կառավարման և հաշվետվողականության մեխանիզմների դրույթների շուրջ։ Հատկապես կարևորվեց հիմնական կատարման ցուցանիշների հարցը, հստակեցվեցին կենտրոնի զարգացման ռազմավարական ծրագրով 2025-2029թթ․-ի համար առաջընթացի գնահատման ցուցիչները։ Հանդիպման ավարտին մասնակիցները կենտրոնի զարգացման հնարավոր ուղիների վերաբերյալ իրենց պատկերացումներն ու առաջարկները ներկայացրին նաև հարցաթերթում։
«Նման հանդիպում-քննարկումները շահեկան են Կենտրոնի գործունեության պլանավորման, մշակված փաստաթղթերի որակի, արդյունքների իրատեսականության և կանխատեսելիության, ինչպես նաև մասնակցայնության և հետադարձ կապի ապահովման տեսանկյունից»,- նշեց Հակոբ Թադևոսյանը։