Կրթական ծրագրերի կենտրոն Կրթության, գիտության, մշակույթի և սպորտի նախարարություն

ԵՊՀ ֆիզիկայի ինստիտուտում ստեղծվում է Օպտիկական միկրոհամակարգերի մշակման և հետազոտման գիտակրթական կենտրոն, որի նպատակն է նորագույն սարքավորումների միջոցով մշակել միջազգային չափորոշիչներին համապատասխան օպտիկական միկրոհամակարգեր, դրանց հիմքով իրականացնել նորարար հետազոտություններ, խթանել միջգիտակարգային համագործակցությունը, պատրաստել բարձր տեխնոլոգիաների ոլորտի արհեստավարժ կադրեր և ձևավորել փոխգործակցային նոր ձևաչափեր կրթության, գիտության ու արդյունաբերության միջև:
Օպտիկական միկրոհամակարգերի մշակման և հետազոտման գիտակրթական կենտրոնի ստեղծումն իրականացվում է Համաշխարհային բանկի համաֆինանսավորմամբ, Կրթական ծրագրերի կենտրոն ԾԻԳ-ի աջակցությամբ իրականացվող «Կրթության բարելավման ծրագրի լրացուցիչ ֆինանսավորում» վարկային ծրագրի շրջանակում:
Կենտրոնի ստեղծման համար առանձնացված է մեկ ամբողջ հարկաբաժին: Այժմ տարածքում ընթանում են վերանորոգման աշխատանքներ: Նոր միջավայրը նպատակ ունի զարգացնելու համալսարանական կրթության միջգիտակարգային հետազոտությունների բաղադրիչը: Ստեղծվող կենտրոնը կպատրաստի կադրեր բարձր տեխնոլոգիաների ոլորտի համար, կաջակցի գիտության և արդյունաբերության միջև նոր կապերի ձևավորմանը և ամրապնդմանը: Կենտրոնը աշխատալու է նաև միջազգային գործընկերների հետ՝ Մոսկվա, Բրյուսել, Ֆրանսիա, ԱՄՆ և այլն: Կենտրոնը, ծառայելով նաև որպես փորձարարական բազա ուսանողների որոշ մասնագիտական առարկաների լաբորատոր աշխատանքների, ավարտական ու մագիստրոսական թեզերի կատարման համար, նպաստելու է համալսարանական կրթության հետազոտական բաղադրիչի զարգացմանը:
ԵՊՀ ռեկտորի հավաստմամբ՝ այս ենթակառուցվածքը փոխելու է կրթական միջավայրը, ստեծվելու են ուսումնառության բոլորովին նոր պայմաններ:
‹‹Այս կենտրոնի ստեղծումն ու դրա նպատակները համահունչ են ազգային առաջնահերթություններին, ինչպես նաև համալսարանի առաքելությանն ու ռազմավարությանը: Ուսանողները կարող են առաջարկել թեմա, գրել ավարտական և մագիստրոսական աշխատանքներ, հետագայում մաս կազմելով նոր կենտրոնին››,- հավելեց ԵՊՀ ռեկտորը:
Կենտրոնի հիմքում ‹‹Լաբորատորիա չիպի›› մշակումն է, գիտական առաջնահերթությունները ևս ձևակերպված են՝ արդեն մեկնարկած հետազոտություններին զուգահեռ ձևավորվող նոր խմբերի հետ կիրականացվեն նոր հետազոտություններ, կստեղծվի նոր մագիստրոսական ծրագիր՝ ‹‹Օպտիկա և ֆոտոնիկա››:
Հավելենք՝ Օպտիկական միկրոհամակարգերի կենտրոնը կհամախմբի բուհերին, գործարար համայնքին, գիտահետազոտական կենտրոններին ոչ միայն համագործակցության, այլև նոր գաղափարների համատեղ մշակման համար:
Օպտիկական միկրոհամակարգերի կենտրոնի մասին պատմող տեսանյութը հասանելի է հետևյալ հղմամբ՝ https://fb.watch/oSuGwFzN3w/