Նորություններ
Բացվեցին յոթ ավագ դպրոցների հիմնանորոգման աշխատանքների մրցութային փաթեթները
19.03.2019
Մարտի 19-ին <<Կրթական ծրագրերի կենտրոն>> ԾԻԳ-ում տեղի ունեցավ 7 ավագ դպրոցների հիմնանորոգման աշխատանքների մրցութային փաթեթների բացման արարողությունը: Վերոնշյալ դպրոցների հիմնանորոգման աշխատանքների համար հետաքրքրվածության հայտ ներկայացրած շինարարական կազմակերպությունների ներկայացուցիչներին ողջունեց <<Կրթական ծրագրերի կենտրոնի>> գնումների գլխավոր մասնագետ Վարդան Պողոսյանը: Նա ներկայացրեց մրցութային փաթեթների բացման ընթացակարգը : Գնումների մասնագետը նշեց, որ համաձայն ընթացակարգի բոլոր հայտերը ներկայացված են փակ վիճակում և կնքված են: Մրցութային փաթեթների բացմանը ներկա էին նաև <<Կրթական ծրագրերի կենտրոն>> ԾԻԳ-ի ֆինանսական ղեկավար Արմինե Խաչատրյանը, գլխավոր հաշվապահ Հասմիկ Հակոբյանը և <<Աջակցություն միջնակարգ դպրոցի երրորդ աստիճանի զարգացմանը>> ենթաբաղադրիչի ղեկավար Գրիշա Բաղդասարյանը: Երևանի թիվ 42 և թիվ 142 ավագ դպրոցների, Երևանի Խաչատուր Աբովյանի անվան հայկական պետական մանկավարժական համալսարանի հենակետային վարժարանի, ՀՀ Գեղարքունիքի մարզի Սևան քաղաքի Խ.Աբովյանի անվան ավագ դպրոցի, ՀՀ Սյունիքի մարզի Գորիս քաղաքի Ակսել Բակունցի անվան թիվ 1 ավագ դպրոցի, ՀՀ Շիրակի մարզի Գյումրի քաղաքի Ակադեմիական վարժարանի և Արթիկ քաղաքի թիվ 3 ավագ դպրոցի հիմնանորոգման աշխատանքներով հետաքրքրված 37 շինարարական կազմակերպություններից հայտ էին ներկայացրել և մրցութային փաթեթների բացմանը ներկա էին 14 կազմակերպության ներկայացուցիչներ: Նշենք, որ հայտատուները իրավասու էին մրցութային հայտ ներկայացնել մեկ, երկու, երեք, չորս, հինգ, վեց կամ յոթ խմբաքանակների համար: Հիշեցնենք, որ մրցույթը անցկացվում է Միջազգային մրցակցային գնման ընթացակարգի համաձայն, որը սահմանված է Համաշխարհային բանկի ուղեցույցներում: Հավելենք, որ մրցութային փաստաթղթերի ամբողջ փաթեթը շահագրգիռ իրավասու հայտատուները ձեռք են բերել անվճար ՝ ներկայացված գրավոր դիմումի հիման վրա: <<Կրթական ծրագրերի կենտրոն>> ԾԻԳ-ի ֆինանսական ղեկավար Ա. Խաչատրյանը հաջորդաբար բացեց բոլոր մրցութային փաթեթների բնօրինակները հայտատուների ներկայությամբ: Նա նշեց, որ փաթեթների բացմանը հաջորդելու են տեխնիկական և ֆինանսական գնահատման աշխատանքները ստեղծված աշխատանքային խմբերի կողմից, ապա՝ Հայտերի գնահատման հանձնաժողովի եզրակացությունը: Հավելենք, որ 7 ավագ դպրոցների հիմնանորոգման աշխատանքների մրցույթի ամփոփումը նախատեսվում է առավելագույնը 120 օր հետո:
