Կրթական ծրագրերի կենտրոն Կրթության, գիտության, մշակույթի և սպորտի նախարարություն

2016 թվականի դեկտեմբերին Հայաստանի ֆիզիկական կուլտուրայի և սպորտի պետական ինստիտուտում (ՀՖԿՍՊԻ) Նորարարությունների մրցակցային հիմնադրամի (ՆՄՀ) շրջանակներում մեկնարկել էր «Ֆիզիկական կուլտուրայի և սպորտի ոլորտում մասնագիտական կրթության արդիականացում և բարելավում» դրամաշնորհային ծրագրի իրականացումը: Այսօր արդեն ծրագրի աշխատանքներն ամփոփվել են: Այս առիթով դեկտեմբերի 17-ին ‹‹Կրթական ծրագրերի կենտրոն» ԾԻԳ-ի ներկայացուցիչները ՀՖԿՍՊԻ դրամաշնորհային ծրագրի ղեկավար Արայիկ Գյոզալյանի ուղեկցությամբ շրջեցին նորաստեղծ ինտերակտիվ լսարանում, լաբորիատորիայում և խորհրդակցությունների դահլիճում՝ որպես ‹‹Ֆիզիկական կուլտուրայի և սպորտի ոլորտում մասնագիտական կրթության արդիականացում և բարելավում» դրամաշնորհային ծրագրի շրջանակներում ստեղծված ֆիզիկական կուլտուրայի և սպորտի ժամանակակից գիտահետազոտական կենտրոնի բաղադրիչներ: Բուհում ԿԾԿ ԾԻԳ–ի ներկայացուցիչներին ողջունեց բուհի ռեկտոր, Վ. Առաքելյանը: Նա ընդգծեց, որ դրամաշնորհային այս ծրագիրը լավ խթան է սպորտի ոլորտում իրականացվող գիտահետազոտական աշխատանքների արդիականացման տեսանկյունից: ‹‹Մենք համոզված ենք` կատարված աշխատանքի արդյունավետության հետագա ցուցանիշները պետք է լինեն ստեղծված հնարավորությունների կիրառումը` ընդլայլնելով սպորտային հետազոտական աշխատանքներում նորարարությունների ներդրման հնարավորությունները: Նմանօրինակ ծրագրերի իրականացումը նոր որակական հարթության վրա է տեղափոխում բուհի գործունեությունն ու նրա վարկանիշը: Այս կենտրոնի առկայությունը բուհում թույլ է տալիս ֆիզիկական կուլտուրայի և սպորտի բնագավառում իրականացնել հենքային գիտական հետազոտություններ և ձևավորել մրցունակ գիտական և նորարարական ներուժ, աստիճանաբար անցում կատարել հետազոտական ինստիտուտի կարգավիճակի››, -հավելեց Վ. Առաքելյանը:
Դրամաշնորհային ծրագրի ղեկավար Արայիկ Գյոզալյանը խոսեց կատարված աշխատանքի, արված ներդրումների մասին, ինչպես նաև մանրամասնեց ծրագրից ակնկալվող արդյունքների և հետագա նպատակների մասին։ Ա. Գյոզալյանը շեշտեց, որ հետազոտական կենտրոնը կնպաստի բուհի միջազգայնացմանը: Միջազգային գործընկերների հետ արդեն կան փոխադարձ պայմանավորվածություններ` նախ անցկացնելու վերապատրաստումներ ձևավորված աշխատանքային խմբի համար, ապա համատեղ իրականացնելու հետազոտական ծրագրեր տարբեր ձևաչափերով: Այցի ընթացքում ներկաները ԾԻԳ-ի խորհրդատու Տիգրան Պետրոսյանի հետ քննարկեցին լաբորատոր սարքավորումների գործարկման և պահպանման հետ կապված մի շարք հարցեր:
Ներկաները քննարկեցին ծրագրի սկզբում սահմանված արդյունքները, դրանց դրսևորումը մոնիտորինգային պլանով ձևակերպված ցուցիչների մակարդակում: Ինչպես ներկայացրեց դրամաշնորհային ծրագրի ղեկավարը, ծրագրի արդյունքում ձեռք բերված արդիական սարքավորումների առկայությունը բուհում կխթանի գործընկեր շրջանակների հետ փոխշահավետ համագործակցային կապերը` մասնավորապես նպաստելով սպորտային բժշկության ոլորտի գիտահետազոտական աշխատանքների ուղղությունների ընդլայնմանը: Հավելենք, որ կենտրոնի հիմնադրման ընթացքում մշակվել է նաև նոր մագիստրոսական ծրագիր, որը գործում է 2018թ. սեպտեմբերի 1-ից:
Խոսելով «Սպորտ Կաբ» կենտրոնի հնարավորությունների մասին, ծրագրի ղեկավարը նշեց, որ հաստատման փուլում է միջազգային արդիական հետազոտական ծրագրի նախագիծը՝ Լյուվենի համալսարանի կինեզիոլոգիայի ֆակուլտետի հետ, որի շրջանակներում նախատեսվում է համատեղ գիտահետազոտական աշխատանքներ, փոխանակման ծրագրեր, նաև կրկնակի դիպլոմի կրթական ծրագրեր:
Բացի այդ, ստեղծվող կենտրոնը հետագայում կնպաստի բուհում ձեռնարկատիրական գործունեության ծավալմանը :
«Լյուվենի համալսարանը գիտության և ձեռնարկատիրական գործունեության արդյունավետ համադրման մեծ փորձ ունի, ուստի մենք հուսով ենք, որ համատեղ իրականացվող ծրագրերը դրական ազդեցություն կունենան նաև մեր բուհում նորարարությունների ներդրման գործընթացում»,-ընդգծեց Ա. Գյոզալյանը: Հատկանշական է՝ կենտրոնը, որը հագեցած է եզակի սարքավորումներով, դեռևս միակն է ողջ տարածաշրջանում: Գիտահետազոտական նորաբաց կենտրոնում մարզիկները կարող են ստուգել սիրտ-անոթաին և շնչառական համակարգի աշխատանքը, մկանների ծանրաբեռնվածությունը: Հնարավորություն կա կետային ճառագայթների օգնությամբ ստուգել վերջույթներն ու ոսկրային համակարգը:
Հավելենք, որ ժամանակակից սարքավորումներով զինված գիտահետազոտական կենտրոնից օգտվելու հնարավորություն ունեն ոչ միայն ՀՖԿՍՊԻ-ի ուսանողներն ու դասախոսները, այլև մարզաառողջարարական ոլորտում մասնագիտացված կազմակերպություններն ու անհատները, քանի որ կենտրոնը հավատարմագրվել է ՀՀ առողջապահության նախարարության կողմից :
Հիշեցնենք, որ սեպտեմբերի 25-ին տեղի ունեցավ «Սպորտ Կաբ» գիտահետազոտական կենտրոնի պաշտոնական բացումը: Հավելենք, որ կենտրոնի ստեղծման պատմությունը և բացման արարողության այլ մանրամասներ հասանելի են «Կրթական ծրագրերի կենտրոն» ԾԻԳ-ի նախկին հրապարակումներում: