Կրթական ծրագրերի կենտրոն Կրթության, գիտության, մշակույթի և սպորտի նախարարություն

Սեպտեմբերի 17-ից «Կրթության բարելավում» ծրագրի «Կրթության համակարգում տվյալների հավաքագրման և առաջընթացի մշտադիտարկման բարելավում» ենթաբաղադրիչի աշխատանքների շրջանակներում մեկնարկել է հանրակրթական ուսումնական հաստատությունների ներկայացուցիչների ՏՀՏ վերապատրաստաման դասընթացների առաջին փուլը: Հիշեցնենք, որ «Կրթության բարելավում» վարկային ծրագրի շրջանակներում նախատեսված է իրականացնել հանրակրթական ուսումնական հաստատությունների շուրջ 4000 ներկայացուցիչների վերապատրաստումներ` առարկաների դասավանդման և ուսումնական հաստատությունների վարչարարության ընթացքում ՏՀՏ-ի կիրառումը խթանելու նպատակով: Առաջին փուլով մեկնարկած հնգօրյա վերապատրաստումներն իրականացվում են վարկային ծրագրի շրջանակներում 2017 թվականին կանադական հեղինակավոր Ագենս Յունիվերսարի Դե Լա Ֆրանկոֆոն կազմակերպության կողմից վերապատրաստված և միջազգային հավաստագիր ստացած 30 տեղական դասախոսների կողմից, որոնցից տասնհինգը Երևանից են, տասնհինգը՝ մարզերից, նույն կազմակերպության կողմից մշակված յոթ մոդուլներով: Նշենք, որ հասցեական վերապատրաստումները մեկնարկել են Երևանից՝ շուրջ 200 պետական հանրակրթական ուսումնական հաստատությունների մեկական ներկայացուցիչների վերապատրաստմամբ: «Կրթության համակարգում տվյալների հավաքագրման և առաջընթացի մշտադիտարկման բարելավում» ենթաբաղադրիչի ղեկավար Հարություն Ղարիբջանյանը կարևորելով ՏՀՏ գործիքների կիրառման անհրաժեշտությունը ուսումնական հաստատություններում նշեց, որ ՏՀՏ գործիքների կիրառման արդյունավետության բարձրացման նպատակով իրականացվող վերապատրաստումները երաշխավորում են նոր մեթոդների կիրառումը հայաստանյան կրթական համակարգում, ինչն էլ անպայման կբարելավի ուսուցման որակը:
Հասցեական վերապատրաստումների առաջին փուլը ընթանում է մայրաքաղաքի թիվ 118 և թիվ 198 ավագ դպրոցներում ու Կրթության ազգային ինստիտուտի երևանյան գրասենյակում: Հատկանշական է նաև մայրաքաղաքում և մարզերում վերապատրաստումների կազմակերպման վայրի ընտրությունը: Հարություն Ղարիբջանյանի հավաստմամբ՝ այս դպրոցների ընտրությունը պայմանավորված է դրանց տեխնիկական հագեցվածությամբ:
<<Վերոնշյալ դպրոցներին, վարկային նախորդ ծրագրի շրջանակներում, «Կրթական ծրագրերի կենտրոն» ԾԻԳ-ի կողմից տրամադրվել են անհրաժեշտ համակարգչային շարժական դասարաններ (mobile computer class), որոնք ներառում են 22 դյուրակիր համակարգիչ՝ լոկալ ցանց ստեղծելու հնարավորությամբ և ինտերակտիվ գրատախտակ: Կրթության ազգային ինստիտուտի երևանյան գրասենյակը, նույնպես ունի անհրաժեշտ տեխնիկական հագեցվածություն>>,- հավելեց Հ. Ղարիբջանյանը : Նշենք, որ մինչև տարեվերջ վերապատրաստումների հաջորդ փուլերը կկազմակերպվեն մարզերում՝ վերապատրաստելով մարզային հանրակրթական ուսումնական հաստատությունների ավելի քան 300 ներկայացուցիչների: