Նորություններ
Մոնիտորինգային այց Հայաստանի ֆիզիկական կուլտուրայի և սպորտի պետական ինստիտուտ
31.01.2018
Հունվարի 29-ին ՀՀ կրթության և գիտության նախարարության և ԿԾԿ ԾԻԳ-ի ներկայացուցիչները աշխատանքային այց են կատարել Հայաստանի ֆիզիկական կուլտուրայի եվ սպորտի պետական ինստիտուտ (ՀՖԿՍՊԻ): Այցի նպատակը Հայաստանի բարձրագույն կրթության Նորարարությունների մրցակցային հիմնադրամի (ՆՄՀ) դրամաշնորհային ընթացիկ ծրագրի մշտադիտարկումն էր: Ներկաները ծանոթացան ՆՄՀ շրջանակներում իրականացվող դրամաշնորհային ծրագրի ընթացիկ աշխատանքներին: Նշենք, որ <<Ֆիզիկական կուլտուրայի և սպորտի ոլորտում մասնագիտական կրթության արդիականացում և բարելավում>> դրամաշնորհային ծրագրի շրջանակներում իրականացվում է մասնագիտական կրթական ծրագրերի արդիականացում և վերանայում, բուհի կարողությունների հզորացմանը միտված ֆիզիկական կուլտուրայի և սպորտի ժամանակակից գիտահետազոտական կենտրոնի ստեղծում՝ ինտերակտիվ լսարանով և առցանց խորհրդակցությունների ու սեմինարների համար նախատեսված դահլիճով: Խմբի անդամներին ողջունեց բուհի ռեկտորը. նա ընդգծեց, որ այս դրամաշնորհային ծրագիրը լավ խթան է կրթության արդիականացման և բուհում միջազգայնացման գործընթացը ամբողջականացնելու տեսանկյունից: Ներկաները դրամաշնորհային ծրագրի ղեկավար Արայիկ Գյոզալյանի ուղեկցությամբ եղան նորաստեղծ ինտերակտիվ լսարանում, լաբորիատորիայում և խորհրդակցությունների դահլիճում: ԾԻԳ-ի ներկայացուցիչները, շրջայցի արդյունքում, ամրագրեցին, որ ավարտվել են խորհրդակցությունների սրահի, ինտերակտիվ լսարանի և լաբորատորիայի համար նախատեսված տարածքների վերանորոգման աշխատանքները: Կենտրոնի համար նախատեսված գույքն ու գրենական պիտույքները ձեռք են բերված, իրականացվել է անհրաժեշտ համակարգչային տեխնիկայի ձեռքբերում և տեղադրում: Ընթացքում է լաբորատոր սարքավորումների երկրորդ խմբաքանակի ձեռքբերման գործընթացը: Սարքավորումների առաջին խմբաքանակը՝ թվով չորսը, արդեն իսկ մատակարարվել էր, փորձարկվել և գտնվում էր գիտահետազոտական կենտրոնի համար նախատեսված տարածքում: Այցի ընթացքում ԿԾԿ ԾԻԳ-ին ՀՖԿՍՊԻ դրամաշնորհային ծրագրի ընթացքում մասնագիտական աջակցություն ցուցաբերող անհատ խորհրդատու Տ. Պետրոսյանը ծրագրի ղեկավար Ա. Գյոզալյանի հետ համատեղ քննարկեց ձեռք բերված մասնագիտական սարքավորումների գործարկման հետ կապված մի շարք հարցեր: Ա. Գյոզալյանը խոսեց լաբորատոր սարքավորումների կարևորության մասին՝ փաստելով, որ դրանք կնպաստեն բուհի հեղինակության բարձրացմանը. <<Նման արդիական սարքավորումների առկայությունը բուհում կբերի սպորտի և ֆիզկուլտուրայի բնագավառում նոր ուղղությունների խթանմանն ու ձևավորմանը>>,-հավելեց ծրագրի ղեկավարը: Նրա հավաստմամբ կրթական ծրագրեր պարունակող համակարգիչներով համալրված ինտերակտիվ լսարանն արդեն օգտագործվում է տեսական և գործնական պարապմունքների իրականացման համար գրեթե ամենօրյա հաճախականությամբ, իսկ խորհրդացությունների սրահում արդեն տեղի են ունեցել ՀՖԿՍՊԻ գիտական խորհրդի տարեկան նիստն ու մի շարք սեմինարներ: Ստեղծվող ֆիզիկական կուլտուրայի և սպորտի ժամանակակից գիտահետազոտական կենրոնի հնարավորություններն ուսումնական գործընթացում լավագույնս օգտագործելու նպատակով՝ բուհն իրականացնում է նաև համապատասխան կրթական բովանդակության ստեղծում: Ա. Գյոզալյանի խոսքով կատարվել են մասնագիտական կրթական ծրագրերի վերանայման աշխատանքներ: Նա նշեց. <<Մենք բավականին լուրջ նախադրյալներ ունենք ակտիվ և արդյունավետ համագործակցություն ծավալելու համար: Բուհն արդեն իսկ քննարկում է հնարավոր համագործակցության ծրագրեր տեղական և արտասահմանյան մի շարք կազմակերպությունների և ուսումնական հաստատությունների հետ, առաջին քայլերն են արվում համատեղ միջազգային ծրագրերի պլանավորման և իրականացման համար>>: Ծրագրի ղեկավարի խոսքով քննարկման փուլում է միջազգային արդիական հետազոտական ծրագրի նախագիծը՝ Լյուվենի համալսարանի կինեզիոլոգիայի ֆակուլտետի հետ համատեղ, որի շրջանակներում նախատեսվում է իրականացնել նաև դասախոսների գործուղում՝ միջազգային փորձի ուսումնասիրման նպատակով: Այս փուլում կազմակերպվել է բուհի աշխատակիցների վերապատրաստում Լատվիայի Սպորտի ակադեմիայի պրոֆեսոր Ալեքսանդրա Կուպրիկայի մասնակցությամբ: Մասնագիտական կրթությունը նորովի կազմակերպելու համար բուհում մշակվում է նաև անհրաժեշտ կրթական բովանդակություն: Դրամաշնորհային ծրագրի ղեկավարը տեղեկացրեց, որ պատրաստ են արդիական կրթական միջավայրի պահանջներին համապատասխան, նորացված ուսումնական պլանները և ընթացքում են առարկայական նկարագրերի մշակման աշխատանքները:
Հավելենք, որ Հայաստանի Հանրապետությունում մասնագիտական սարքավորումներով հագեցած այս գիտահետազոտական կենտրոնը կնպաստի ֆիզկուլտուրայի և սպորտի բնագավառում հիմնարար հետազոտությունների իրականացմանը:
