Կրթական ծրագրերի կենտրոն Կրթության, գիտության, մշակույթի և սպորտի նախարարություն

ՀՀ տարածքային կառավարման և ենթակառուցվածքների նախարար Գնել Սանոսյանն ապրիլի 2-ին այցելել է Ճարտարապետության և շինարարության Հայաստանի ազգային համալսարան:Նախարարը ՃՇՀԱՀ ռեկտոր Եղիազար Վարդանյանի հետ շրջայց է կատարել համալսարանում, ծանոթացել Ճանապարհաշինարարական փորձարկումների լաբորատորիայի հնարավորություններին և իրականացվող հետազոտություններին: Լաբորատորիան ստեղծվել է Համաշխարհային բանկի(ՀԲ) համաֆինանսավորմամբ, ‹‹Կրթական ծրագրերի կենտրոն›› ԾԻԳ-ի ‹‹Կրթության բարելավում›› վարկային ծրագրի Նորարարությունների մրցակցային հիմնադրամի (ՆՄՀ) շրջանակներում: Նշենք, որ ՃՇՀԱՀ-ի դրամաշնորհային ծրագրով իրականացվել է բուհի կարողությունների հզորացմանը միտված արդիական ուսումնագիտափորձարարական լաբորատոր բազայի ստեղծում, ինչպես նաև մագիստրոսական կրթական ծրագրի մասնագիտական դասընթացների թվայնացում՝ Moodle էլեկտրոնային հարթակի կիրառմամբ:
Ճանապարհաշինարարական փորձարկումների լաբորատորիան ամբողջությամբ հագեցած է նորագույն թվային սարքավորումներով, կից գործում է համակարգչով և ցուցադրման պրոյեկտորով հագեցված լսարանը: Ճանապարհաշինարարական փորձարկումների լաբորատորիայի սարքավորումները հնարավորություն են տալիս ուսումնական նպատակով փորձարկել ճանապարհաշինական նյութեր՝ ասֆալտաբետոն, բիտում, խիճ, ինչպես նաև որոշել բնահողի խտությունը և արտաքին բեռնվածքի տակ կամուրջների կամ այլ կառույցների առանձին տարրերի ճկվածքները։Նշենք, որ դրամաշնորհային ծրագրի արդյունքում ձեռք բերված ժամանակակից սարքավորումների միջոցով արդեն իսկ իրականացվում են գիտահետազոտական աշխատանքներ: Լաբորատորիայում ակտիվորեն իրականացվում են նաև աշխատանքներ, որոնց արդյունքում ակնկալվում է ստանալ հետագա առևտրայնացման ներուժ ունեցող կարևոր գիտական նորույթներ: Նախարարն ուրախությամբ արձանագրել է, որ ՃՇՀԱՀ լաբորատորիաներում կան սարքավորումներ, որոնք Հայատանում միակն են։ «Ակնհայտ է, որ ճանապարհաշինության, ջրամբարաշինության և շինարարության այլ ոլորտներում իրականացվող աշխատանքների մասով համալսարանում կա մեծ պոտենցիալ, գիտական միտք, նոր գաղափարներ, որոնք պետք է կիրառել գործնականում։ Մենք պատրաստ ենք այդ համագործակցությանը։ Գիտության նոր նվաճումները պետք է արագ բերել շինարարության դաշտ և հրաժարվել հին մեթոդներից։ Շատ կարևոր է, որ բուհում կա և՛ գիտական պոտենցիալ, և՛ անհրաժեշտ գործիքներ, և՛ լաբորատոր սարքավորումներ, որոնք բուհին դարձնում են ավելի մրցունակ»,-ընդգծել է նախարարը:
Բուհի ռեկտորը կարևորելով ՏԿԵ նախարարության հետ համագործակցությունը ոչ միայն կրթական, այլև գիտական առումով՝ նշեց, որ ձեռքբերված սարքավորումներովայս պահին Վեդիի ջրամբարի պատվարի ամրությունն ու նյութերի փորձաքննությունն են իրականացնում, հավելելով որ մինչ լաբորատորիայի ստեղծումը նման փորձաքննություն Իրանում էին միայն կարողանում իրականացնել:
Ջրի քիմիայից մինչև անօդաչու թռչող սարքերով երկրաբանական ուսումնասիրություն այսօր հնարավոր է դարձել իրականացնել դրամաշնորհային ծրագրի շրջանակներում ձեռք բերված սարքավորումների շնորհիվ: Շրջայցից հետո ՀՀ տարածքային կառավարման և ենթակառուցվածքների նախարարության և Ճարտարապետության և շինարարության Հայաստանի ազգային համալսարանի միջև ստորագրվել է համագործակցության հուշագիր:
Տեսանյութը հասանելի է այստեղ՝
https://www.facebook.com/watch/?v=4689427641186977