Նորություններ

Գինեգործական կրթության գիտաուսումնաարտադրական բազա ՆՄՀ դրամաշնորհով

12.12.2018

Դեկտեմբերին 12-ին Արմավիրի մարզի Ոսկեհատ համայնքի ուսումնափորձնական տնտեսությունում տեղի ունեցավ Հայաստանի ազգային ագրարային համալսարանի (ՀԱԱՀ) Գինեգործական կրթության գիտաուսումնաարտադրական բազայի պաշտոնական բացումը: Գինեգործական կրթության գիտաարտադրական բազան ստեղծվել է Համաշխարհային բանկի համաֆինանսավորմամբ, «Կրթական ծրագրերի կենտրոն» ԾԻԳ-ի «Կրթության բարելավում» վարկային ծրագրի Նորարարությունների մրցակցային հիմնադրամի (ՆՄՀ) շրջանակներում:
Գինեգործական կրթության գիտաուսումնաարտադրական բազայի ստեղծման պատմությունը սկսվել է 2015 թ.-ի դեկտեմբերից, ՆՄՀ շրջանակում մեկնարկել էր «Գինեգործական կրթության գիտաարտադրական բաղադրիչի զարգացում(ԳԿԳԲԶ)» դրամաշնորհային ծրագրի իրականացումը: Դրամաշնորհային ծրագրի արդյունքում Արմավիրի մարզի Ոսկեհատ համայնքի ուսումնափորձնական տնտեսությունում ստեղծել է գինեգործության ամբողջական արդյունավետ կրթական համակարգ, ինչպես նաև իրականացվել է գիտափորձերի համար նախատեսված ժամանակակից գիտաարտադրական տեխնիկայով հագեցած օրինակելի տնտեսության գործարկում: Գինեգործական կրթության գիտաուսումնաարտադրական բազայի բացման արարողությանը ներկա են գտնվել ՀՀ գյուղատնտեսության նախարարի պաշտոնակատար Գ. Գևորգյանը, ՀՀ կրթության և գիտության փոխնախարար Հ. Հովհաննիսյանը, ՀԱԱՀ ռեկտորի պաշտոնակատար Վարդան Ուռուտյանը, «Կրթական ծրագրերի կենտրոն» ԾԻԳ-ի տնօրեն Գ. Հովհաննիսյանը, ԾԻԳ-ի ներկայացուցիչներ, դասախոսներ և ուսանողներ:
Գիտաուսումնաարտադրական բազայի բացման արարողության սկզբում ներկաներին ողջունեց ՀԱԱՀ ռեկտորի պաշտոնակատար Վարդան Ուռուտյանը: Նա խոսեց կատարված հսկայածավալ աշխատանքի մասին, ներդրումների, ինչպես նաև ծրագրից ակնկալվող արդյունքների և նպատակների մասին:
«Այս գիտաուսումնաարտադրական բազան պրակտիկ հմտություններ ձեռքբերելու հնարավորությունից բացի, նաև խթանելու է ագրարային համալսարանի արտադրական գործունեությունը»,-նշեց Վ. Ուռուտյանը:
Ռեկտորի պաշտոնակատարը փաստեց՝ դրամաշնորհային ծրագիրն իրականացավ գործընկերների շնորհիվ. «Մեր համատեղ աշխատանքի ու համագործակցության արդյունքում ստեղծվել է գիտաուսումնաարտադրական բազա, որը պետք է ապահովի կրթության, գիտության և արտադրության կապը»:
Երախտագիտության խոսք հղելով՝ նա հուշանվերներ հանձնեց գործընկերներին և արդյունավետ աշխատանք մաղթեց նորաստեղծ բազային :
ՀՀ գյուղատնտեսության նախարարի պաշտոնակատար Գեղամ Գևորգյանը կարևորեց գիտաուսումնաարտադրական բազայի բացումը, փաստեց, որ բազան նշանակալի դեր կունենա գինեգործության ոլորտում նոր հաջողությունների գրանցման համար: «Սա նոր լիցք է հաղորդելու և գինեգործության ոլորտում առողջ մրցունակության հիմք է ստեղծելու»,- շեշտեց Գ. Գևորգյանը:
ՀՀ ԿԳ փոխնախարարի պաշտոնակատար Հ. Հովհաննիսյանը բեղմնավոր և արդյունավետ աշխատանք մաղթելով նորաստեղծ բազային, շնորհակալություն հայտնեց Համաշխարահային բանկին, Կրթական ծրագրերի կենտրոնին և բուհի ղեկավարությանը կատարված համատեղ հսկայածավալ աշխատանքի համար :
Հ. Հովհաննիսյանը նշեց, որ շատ կարևոր է նմանօրինակ ծրագրերի իրականացումը, Հայաստանում. «Նմանօրինակ նորարարական ծրագրի իրականացումը բուհերում փաստում է «Կրթական ծրագրերի կենտրոն» ԾԻԳ-ի և բարձրագույն ուսումնական հաստատությունների շարունակական համագործակցության մասին»:
Խոսելով դրամաշնորհային ծրագրերի արդյունավետության մասին փոխնախարարը շեշտեց. «Կրթական ծրագրերի կենտրոնի» աջակցությամբ իրականացված դրամաշնորհային ծրագրրերում շեշտադրվում է երկու կարևոր բաղադրիչ՝ ծրագրի շարունակականությունը և նորարարությունը, ինչը նպաստում է բուհերում գիտական ու նորարարական աշխատանքների ծավալմանն ու գիտական գործունեության արդյունքների առևտրայնացմանը: «Կրթական ծրագրերի կենտրոն» ԾԻԳ-ի աջակցությամբ ստեղծված նմանատիպ կենտրոնները հնարավորություն են ընձեռում մեր կրթությունը ապակենտրոնացնել` ուսանողին լսարանից տեղափոխելով պրակտիկ դաշտ:
Անդրադառնալով նորաստեղծ բազայի գործունեությանը Հ. Հովհաննիսյանը նշեց. «Հուսով եմ, որ հաջորդ տարի մայրաքաղաքի «գինաշատ» մասում՝ Սարյան փողոցում անցկացվող գինու փառատոնին երևանցիներն ու մայրաքաղաքի հյուրերը կվայելեն Ագրարային հալասարանի արտադրության գինին» :
Բացման հանդիսավոր արարողությունից հետո, հյուրերը ծանոթացան նորաբաց ուսումնաարտադրական բազային: Ներկաները շրջայցը սկսեցին գիտաուսումնաարտադրական բազայի արտադրական տարածքից. արտադրական նշանակության տարածքներում խաղողի խմորման համար նախատեսված տարաներն տեղակայված էին, հումքի և գինու պահեստավորման համար տակառները համապատասխան տեղում էին: Շրջայցի ընթացքում ՀԱԱՀ ռեկտորի պաշտոնակատարը շեշտեց գինեգործության մասնագիտացված լսարանի կարևորությունը, ինչը գինեգործական կրթություն ստացող ուսանողներին հնարավորություն կտա ձեռք բերել գործնական հմտություններ գինու արտադրության, շշալցման, պահպանման, մատակարարման վերաբերյալ և կնպաստի գինու արտադրությունում նոր տեխնոլոգիաների մշակմանն ու ներդրմանը: Շրջայցն ավարտվեց գինու համտեսով:
Այսպիսով, ՀԱԱՀ դրամաշնորհային ծրագրի արդյունավետ իրականացման արդյունքում ստեղծվել է ժամանակակից տեխնիկայով համալրված ուսումնաարտադրական տնտեսություն, որը կարող է տարածաշրջանում իրականացնել գինեգործական կրթական, խորհրդատվական և արտադրական օրինակելի ծառայություններ:
 

Նորություններ

10.01.2019 Վերաբացվեց Մարտունու հիմնանորոգված և կահավորված ավագ դպրոցը Հունվարի 8-ին իր դռները բացեց Մարտունի քաղաքի Տ. Աբրահամյանի անվան հիմնանորոգված և կահավորված ավագ դպրոցը, որը 5-րդն է առաջին փուլով հիմնանորոգված և շահագործման հանձնված Մեծամորի, Արարատի, Հրազդանի և Նոյեմբերյանի ավագ դպրոցների շարքում: Դպրոցի հիմնանորոգումն իրականացվել է Համաշխարհային բանկի համաֆինանսավորմամբ, «Կրթական ծրագրերի կենտրոն» ԾԻԳ-ի «Կրթության բարելավում» վարկային ծրագրի շրջանակներում: Դպրոցի տնօրեն Վարդան Ավետիսյանը փաստում է, որ այս հիմնանորոգված դպրոցի... 26.12.2018 Շնորհավոր Ամանոր և Սուրբ Ծնունդ Հարգելի հայրենակիցներ, «Կրթական ծրագրերի կենտրոն» ԾԻԳ-ը շնորհավորում է Ամանորի և Սուրբ Ծննդյան տոների կապակցությամբ: 2018 թվականը մեզ համար եղավ նշանակալի հաջողությունների ու նոր նախաձեռնությունների տարի: Արդյունավետ ու համակարգված աշխատանքի արդյունքում 2018 թվականին ևս կարողացանք իրականացնել մի շարք ծրագրեր հանրակրթության և բարձրագույն կրթության ոլորտում: Ավարտվում է 2018 թվականը, որի ընթացքում մեր արդյունավետ աշխատանքի շնորհիվ մայրաքաղաքում, Վայոց Ձորի, Լոռու և... 25.12.2018 ‹‹Կրթական ծրագրերի կենտրոն ›› ԾԻԳ-ն ամփոփում է 2018-ի ընթացքում կատարված աշխատանքները ‹‹Կրթական ծրագրերի կենտրոն›› ծրագրերի իրականացման գրասենյակն ամփոփել է 2018 թվականին ‹‹Կրթության բարելավում›› վարկային ծրագրի շրջանակներում կատարված աշխատանքները: Ներկայացնենք տարվա ընթացքում ԾԻԳ-ի գործունեության համապարփակ պատկերը: 2018թ.-ի ընթացքում ‹‹Հանրակրթության որակի բարելավում›› բաղադրիչի ‹‹Դպրոցին՝ երեխաների պատրաստվածության բարձրացում և կրթության հավասար մեկնարկային...